"O mà ! ... O mà !... O Diu ! aiutu, Signore ?"
Mariola grida e piegni tantu forte che tutta a famiglia si sveglia e corre :

"Ma chi c'é ?... chi hai ?... chi c'è ?...".

In piena notte, bella cume un fiori, à sedici anni, ben purtante, e allegra, Mariola si trova tuttu d'un trattu, presa di dulori tantu forti, ch'ella grida à crepa cori.

A prima arritta, Zia Francesca, a mamma, piegni e soffri ancu più ca a so figliola...

Chi fà?... I vicinu hanu intesu i gridi e so corsi. A casa è piena e ognunu dice a soia. In sta parapiglia, i dui chjughi mezzi vistuti piegninu forti e senza sapè parchi !

Subitu, cummare Antonia li segna l'occhji : un li po fà ca bè !... A mamma, senza arristassi di piegna, face tisane calde di tiglioli, di finucchjetta, di matrunella... Ma, i dulori crescinu !

"Un'impiastru di farina di linu, di farà bè, dice cummare paula, intantu, mettimu un pianellu bellu caldu..."

Dumenicu, u fratellu, è prestu partitu nanta u so mulu par circà u duttore.

U tempu passa, ma nienti po calmà i dulori e si lagni e si brioni affendani tutti i cori... Povara mariola !....

... A porta s'apri forti e u Duttori entre : "Par piacé ! surtiti tutti ! ma, chi a mamma resti !".

Zia Francesca spiega :

"S'é pruvatu di tuttu, tisane calde, impiastru di farina di linu...

- Basta! ... Basta! ...".

U Duttore ha cumpresu e si metti i dui mani in capu :

"un c'é nunda di gravi !... ma, bisogna subitu à entr'à u spedale !... Un "Appendicite" à uparà prestu e in qualchi ghjorni sarà di ritornu... Curaghju, o zi !".

Si volta versu Dumenicu :

"Bisogna à fà prestu ! ci vurria un cabriolè".

.... U cabriolè é truvatu, e si parti, Mariola, gridendu e piegnendu à mezzu à u Duttore e a u so fratellu...

.... Zia Francesca, angusciasa, piegni talmenti chi a so voce è affannosa e arraghjta... un ni po più !

"O mammo, dice Ninetta, a so figljulina, un piegniti più ! In qualchi ghjorni, Mariola sarà guarita e di ritornu...

- Guarita ?... chi sa chjappu sta malatiaccia ?...

- chi v'ha dettu u duttore ?

- Eiu, a me zitella, un parlu micca francesu, ma capiscu tuttu...

- E allora ?

(Zia Francesca piegni ancu più forti).

-U duttore s'è missu e mane in capu e po ha dettu :

" Ha a malatia des lapins d'ici" !

I nostri cunigliuli so tutti morti annu e un n'avemu più fattu ! ... Si a me figliola s'é chjappa a malatia di i cunigliuli, un c'é più d'évè speranza ! ...

E zia Francesca piegni e vuciareghja...

"O Mammo, un grideti più ! un n'è micca cio che voi diti, "L'appendicite" è una inflammazione in corpu, ma presa à tempu, è prestu guarita !

Da qui, deci ghjorni, Mariola sarà in casa : "E cusi sia ! a me zitella ! e chi u signore ti senti !".

Angèle Finelli